Izraeli duket se do të jetë tolerant me rastin e festës së Krishtlindjeve edhe për besimtarët e krishterë nga Gaza që duan të vizitojnë Betlehemin. Qeveria izraelite ka ndryshuar një vendim të mëparshëm dhe tani do t’i lejojë të gjithë besimtarët e krishterë në Rripin e Gazës që të udhëtojnë në Jeruzalem dhe Bregun Perëndimor.
Agjencia izraelite e Mbrojtjes e ngarkuar me çështjet civile palestineze “COGAT”, më 22 dhjetor u shpreh se lejet do të lëshoheshin “në përputhje me vlerësimet e sigurisë”.
Izraeli kufizon lëvizjet jashtë Rripit të Gazës, territor i kontrolluar nga Hamasi, një grup islamik që izraelitët e konsiderojnë si një organizatë terroriste.
Më 22 dhjetor, agjencia njoftoi në Twitter se ka lehtësuar udhëtimin për popullatën e krishterë të Gazës, për festën e Krishtëlindjes.
Jeruzalemi, Betlehemi, Nazareti dhe qytete të tjera të shenjta, tërheqin mijëra pelegrinë çdo sezon pushimesh.
Kisha e Lindjes, e themeluar në tokën e njohur tradicionalisht si vendi i lindjes së Jezusit, ndodhet në Betlehem./Fjala.al/
