Ish-kryenegociatorja e Kosovës në dialogun me Serbinë Edita Tahiri del kundër minishengenit.
Ajo nuk ka kursyer fjalët më të rënda për kryeministrin e Shqipërisë Edi Rama.
Përmes një postimi në Facebook, Tahiri ka akuzuar Edi Ramën për mbështetje të idesë për krijimin e Serbisë së Madhe.
“Se ideja e ‘mini-Shëngenit’ krijon bërthamën ekonomike për ‘Serbinë e Madhe’ këtë gjithë shqiptarët po e shohin, përveç Edi Ramës. E lumtur me reagimet e mençura dhe strategjike të shqiptarëve për të mbrojtur interesat kombëtare dhe për të penguar neo-hegjemoninë serbe në Ballkan”, shkruan ajo.
Në takimin e minishengenit kryeministri Edi Rama i bëri thirrje Kosovës që të bëhet pjesë e këtij procesi, pavarësisht faktit se Serbia nuk e njeh Kosovën shtet, madje edhe nuk i pranon as krimet e tmerrshme që ka kryer ndaj popullatës së pafajshme shqiptare gjatë kohës së luftës.
Nisma për krijimin e mini-Shëngenit u konkretizua në tetor të këtij viti, pasi BE-ja refuzoi të hapë procesin e bisedimeve me Shqipërinë dhe Maqedoninë e Veriut.
Drejtues të shtetit të Kosovës kanë refuzuar ftesat për pjesëmarrje në takimet për mini-Shengenit ballkanik, duke thënë se krijimi i tij paraqet zgjerim të ndikimit të Rusisë në Ballkan.
