Kryeministri Edi Rama, mblodhi sot në qytetin e Durrësit kabinetin qeveritar për tetë orë rresht, për të analizuar vitin 2019 dhe masat që duhet të merren për pasojat e tërmetit, ku është kërkuar rindërtimi sa më i shpejtë i shtëpive.
I pyetur në lidhje me shpërblimin për pensionistat që tashme ishte kthyer në një traditë në fundvit, ai pohoi se do shihet gjithçka duke u bazuar tek gjendja në të cilën ndodhet vendi, ndersa shtoi se; “Ideja ka qenë dhe mbetet që ne të mos cënojmë prioritetet”.
“Nesër kemi mbledhjen e qeverisë dhe do të flasim për këtë. Çka na ka ndodhur na ka bërë më të kujdesshëm do të thosha, jo të frenuar. Ideja ka qenë dhe mbetet që ne të mos cënojmë prioritetet dhe sigurisht që pensionistët nuk janë kurrë një kategori që mund ta harrojmë ose neglizhojmë. Por nga ana tjetër jemi të kujdesshëm që do ta përballojmë rindërtimin, qoftë edhe vet. Ndaj duhet të presim dhe rezultate e Konferencës së Donatorëve për fondet, në mënyrë që të kemi një qartësi se sa do të jetë barra jonë në barrën e përgjithshme. Do të komunikojmë në vijim. Është pyetje me vend dhe është një shqetësim që e kam të qartë dhe të fortë.”, pohoi Rama./Fjala.al
