Mesa duket ka një çlirim kulturor post festival 58, ku shumë prej këngëtarëve, jo pjesëmarrës, apo edhe opinionistë jo artistë, zgjedhin flasin hapur për nivelin e prurjeve këtë vit në RTSH. Pakënaqësitë dhe kampet e ndara për dy këngët që u renditën mes vendit të parë dhe të dytë, vijojnë të shpërfaqin reagime për nivelin artistik, kush e meritonte dhe kush jo kurorën për të qenë pjesëmarrëse për Eurovision.
E ndërsa llogaritë e disave nxjerrin Elvana Gjatën fituese me këngën “Me tana”, të tjerë llogarisin kualitetin në disa nivele që pse ajo nuk e mori dot vendin e parë dhe në vend të saj u ngjit në krye Arilena Ara me këngën “Shaj”.
Një artiste tanimë e shpërngulur me karrierën e saj në Amerikë, emri artistik i të cilës është Jane Janex, (Xhejn Kumrija, ish-konkurrente në “The Voice of Albania 1”,) bën një shpjegim të sajin ku argumenton:
“E mirë, ja u them unë. Muzika s’kishte pikë kualiteti. As në kompozim, as në sound, as në progresion akordesh, as arranxhim. Bazë instrumentale e ripërsëritshme dhe bajate, si çdo këngë tjetër e së njëjtën “frymë”, që është përhapur si sëmundje në Shqipëri. Le të mos flasim për origjinalitet apo stilistikë, gjithnjë në kuadrin muzikor. Këngë e përbërë nga samples copy paste (shembuj të kopjuar)! Seriously?!
Të isha unë Juri, as që do ishte kandidate për fitore…..dhe kështu do ishte shmangur e gjithë polemika mediatike ? Sorry, not sorry!”
