Njerëzit jetojnë për t’u mbajtur mend edhe në fund të jetës. Vërtet vende si varrezat mund t’ju duken të kobshme, por nëse do t’i shihnit nga afër këto varreza, me siguri do të ndërronit mendje. Ato ndoshta nuk janë vendi ideal për një “piknik”, por një shëtitje në to nuk duhet ta humbisni.
Varrezat “Père Lachaise” në Paris, për shembull, sot kanë me dhjetëra mijëra varre, edhe të disa personave të famshëm të letërsisë. Pra, përveçse një vend varrimi, ato kthehen edhe në pika pelegrinazhi historik, ose oaze në mjedisin urban.
Ndërsa në veri të Rumanisë, “Varrezat e Gëzueshme” kanë vetëm qindra varre, por janë të lyera me ngjyra shumë të gjalla, madje edhe epitafet kanë poema komike.
Një spektakël pamor që i ndihmon të afërmit të ruajnë kujtime të rëndësishme të të dashurve dhe padyshim të bukura.
Varrezat Highgate, Londër, kanë qenë prej kohësh vendi më i lakmuar për t’u varrosur. Tashmë të mbuluar me dredhka, varret kanë një pamje vërtet tërheqëse. Mes 170,000 varreve janë ato të Karl Marksit, Lucien Frojdit, novelistit Xhorxh Eliot, e madje edhe të një spiuni rus që u varros me arkivol të vulosur me plumb, për shkak se trupi kishte ende rrezatim.
Varrezat Kombëtare të Arlingtonit, në SHBA. Pak vende kanë hijeshinë e këtyre varrezave, ku nderohen rreth 400,000 dëshmorë amerikanë.
Mali i Ullinjve, Jerusalem. Ky vend i shenjtë i hebrenjve, ku ata besojnë se ndodh ringjallja, ka rreth 3000 vite që shërben si vend ku janë prehur profetë të krishterë, rabinë dhe kryeministra izraelitë.
Varrezat Okunoin janë më të mëdhatë në Japoni, dhe janë hapur që në vitin 816, plot 1200 vite më parë. Varreza është e mbrojtur nga UNESCO, dhe aty prehen me qindra mijëra murgj budistë.
“La Recoleta”, në Buenos Aires të Argjentinës, duket si qytet më vete. Zonja e parë më e famshme e Argjentinës, Eva Peron, është varrosur këtu rreth 5 metra nën tokë, që të mos ia ngacmonin varrin.
Varrezat e Katedrales “Snt.Andrews”, Skoci. Kjo katedrale ka qenë dikur më e madhja në Skoci, por luftërat dhe koha e kanë kthyer në një ndërtesë të vjetër e të bukur. Varrezat që e rrethojnë e bëjnë pamjen edhe më ngjethëse.
Green-Wood, Bruklin, SHBA, kanë varret e gjeneralëve të famshëm të Luftës Civile Amerikane. E rrethuar me një park, këto varreza kanë qenë gjithnjë vend i këndshëm për të gjetur qetësi./Fjala.al/ Përgatiti: Kamela Liko/
