Presidenti i Kosovës Hashim Thaçi pritet të mandatojë ditën e sotme Albin Kurtin si kryeministër për të formuar qeverinë e re. Edhe pse ky i fundit nuk i ka votat e duhura për të krijuar kabinetin e ri qeverisës.
Pas konstituimit të Parlamentit Thaçi pritet t’i japë mandatin Albin Kurtit sot në orën 11:00. Megjithatë, kreu i Lëvizjes Vetëvendosje nuk i ka votat për të formuar qeverinë e re, pasi negociatat me LDK-në e Isa Mustafës dështuan për shkak të pretendimeve për postin e Presidentit, që ndau dy partitë.
Ndërkaq, pritet se çfarë do të ndodhë në vijim, nëse do të ketë tentativa të tjera nga Vetëvendosje për koalicion me LDK-në.
Isa Mustafa u shpreh dje se mund të votojë Albin Kurtin për kryeministër, ashtu sikur votoi kryetarin e Kuvendit nga Vetëvendosje dhe më pas partia e tij të dalë në opozitë.
“Nëse LVV nuk është gati për këtë marrëveshje dhe sheh LDK si pengesë se po deklaron se LDK është e gatshme të heq dorë nga kërkesat për përgjegjësi, duke ia lënë këto pozita VV. LDK është e gatshme që të votojë me 28 deputetë për institucione të reja, kryetarin e kuvendit dhe Qeverinë pa LDK, nëse nuk janë të gatshëm që të bashkëqeverisin me ne. Nëse ne tërhiqemi nga përgjegjësitë qëndrojmë si parti opozitare, sepse parti ndërmjetëse në Kuvend nuk ka” deklaroi ai.
