Presidenti i Kosovës, Hashim Thaçi, gjatë konferencës së fundvitit, nuk ka lënë pa përmendur iniciativën Mini-Schengen duke mos anashkaluar çështjen e njohjes së Kosvës nga ana e Serbisë.
Sipas tij, Kosova nuk është trajtuar si shtet dhe kjo i ofruar Serbisë alibi për shtyrjen e njohjes. Ai nuk ka harruar të përmendë mungesën e Kosovës në tryezën e Mini-Schengen. Thaçi i mëshon faktit se Kosova nuk ka qenë e ftuar fare e as e trajtuar si shtet i pavarur dhe sovran.
“Ne jemi vëllezër, nuk do të mund të tradhtoj as interesat e Shqipërisë, as për Kosovën sepse të dy shtetet tona funksionojnë si shtete normale, me kushtetuta dhe shtete moderne. Vlerësoj kontributin e mikut tim, kryeministrit të Shqipërisë. Edi Rama është miku im i zgjedhur, vlerësoj angazhimin e tij për paqe dhe stabilitet, por, në të njëjtën kohë vlerësoj që Serbia duhet të trajtohet me një tjetër gjuhë. Në fakt iniciativa të tilla që nuk e trajtojnë Kosovën si shtet të pavarur, i ofrojnë alibi Serbisë për shtyrjen e njohjes.
Kosova është shumë e interesuar dhe ka dëshmuar veten për fqinjësi të mirë me të gjitha vendet e rajonit – si parakusht për lëvizje më të shpejt në BE dhe NATO. Jemi të bindur se bashkëpunimi rajonal hap përspektivë të gjithanshme. Dua të sqaroj se në takimin e parë në Novi Sad, në mes Serbisë, Shqipërisë dhe Maqedonisë së Veriut – Kosova nuk ka qenë e ftuar fare e as e trajtuar si shtet i pavarur dhe sovran”, tha Hashim Thaçi./Fjala.al
