Policia njoftoi sot arrestimin e dy personave për vdekjen e 35-vjeçarit, Elvis Josifi në Korçë që u godit ditën e djeshme nga një vinç në vendin e punës.
Në pranga kanë rënë përgjegjësi teknik i firmës së ndërtimit F.P, 67-vjeç dhe 41 vjeçari A.Z me detyrë manovrator në firmën e ndërtimit, të cilët akuzohen për “shkelje të rregullave në vendin e punës”.
Avokati mbrojtës i dy të akuzuarve shprehet se nuk kanë asnjë përgjegjësi për ngjarjen, ai i kërkon prokurorisë të bëjë hetime të plota që të mos vihemi përballe faktit të arrestimit të njerëzve pa prova.
“Përsa i përket ngjarjes së djeshme ka rezultuar se tek pompa e vijës së betonit (presa) është shkëputur një pjesë e krahut, i cili bën komandimin e presës sipas lartësisë, një pjesë metalike e cila e ka bërë të pamundur kontrollin e krahut të presës që hedh betonin në lidhje me pozicionin pasi si makineri ajo është një makineri që komandohet në distancë ,nëpërmjet pultit të komandimit që e përdor manovratori.
Duke u shkëputur kjo pjesë manovratori e ka patur të pamundur që të bëjë komandimin e presës dhe kjo ka sjellë rënien e presës në gjendje të lirë deri në pozicionin që ajo ka ndaluar ku ishte pjesa e shtruar e hekurave që do hidhej betoni. Si rezultat i kësaj ka humbur jetën një punëtor i cili mbante tubin e presës.
Unë mendoj se këto arrestime janë bërë duke shfrytëzuar ndjeshmërinë, të gjithë jemi koshientë që një person ka humbur jetën, por kurrsesi nuk mund të arrestohet tekniku i kantierit dhe manovratori.
Përgjegjësinë duhet të nxjerrë prokuroria mbasi të dalë dhe një akt ekspertimi në lidhje me vendin e ngjarjes të bëhet dhe ekspertimi i automjetit.
Automjeti ka qenë i kolauduar përsa i përket anës se dokumentacionit ka qenë në dokumentacion të rregullt” deklaroi avokati./Fjala.al
