Nuk ndalen grabitjet e dhunshme. Rasti i fundit është shënuar gjatë orëve të para të ditës së sotme në Memaliaj. Shënjestër e grabitësve është një i moshuar i cili jetonte i vetëm.
Ai është dhunuar dhe më pas ka dorëzuar një shumë të madhe parash që ka patur në shtëpi. Por pak orë pasi është zbuluar ngjarja, burri i moshuar është dërguar në spital. Atje ka shkuar edhe policia e cila ka nisur edhe punën për zbulimin e autorëve të kësaj ngjarjeje të rëndë.
Burri, që është afër të 90-ve ka treguar se kanë qenë dy persona brenda të cilët e kanë lidhur dhe dhunuar. Më pas edhe i kanë kërkuar të tregojë se ku ka qenë e fshehur sasia e parave që me sa duket ia kanë sjellë fëmijët që jetojnë jashtë vendit.
Burimet nga policia lokale bëjmë me dije se është grabitur banesa e të moshuarit Hiqmet Ramadani, ku autorët e maskuar kanë marrë një shumë prej 12 milionë lekësh.
Sipas informacioneve autorët kanë dhunuar pronarin e shtëpisë, 87-vjeçarin Ramadani, i cili ka përfunduar në spital nga plagët e marra.
Gjatë rrëfimit të tij për policinë burri ka treguar se jeton i vetëm në fshat, pasi fëmijët i ka në emigracion. Ai ka thënë se ka qenë në gjumë në momentin që grabitësit e maskuar dhe të armatosur kanë hyrë në banesë.
Po ashtu ai ka treguar se personat ishin të veshur me të zeza dhe se nuk ka mundur t`i njohë nga zëri. Policia ka bërë një sërë shoqerimesh në të gjithë zonën. Asnjë e dhënë deri më tani nuk ka ardhur për ndonjë të dyshuar të vënë në pranga.
Rastet e grabitjes nëpër banesa janë të shumta. Policia në fakt asnjëherë nuk ka nxjerrë shifra në lidhje me këtë krim që thuajse është më i shpeshti në vendin tonë, ku jo pak herë pa patur edhe viktima. /Fjala.al/
