Presidenti Meta me anë të një deklarate në Facebook ka reaguar në lidhje me vlerësimin e shkallës së investimeve në Shqipëri të realizuar nga agjencia prestigjioze ndërkombëtare Fitch.
Sipas këtij raporti Shqipëria është përkeqësuar në vlerësimin e shkallës së perceptimit të investitorëve, nga niveli 59.8, në 53.5.
Meta ka tërhequr vëmendjen ndaj aktorëve politikë, duke cilësuar se faktori kryesor i këtij përkeqësimi është kriza e rëndë politike në vend.
Statusi i presidentit Meta:
Dua të shpreh shqetësimin për raportin e agjencisë prestigjioze ndërkombëtare Fitch për vitin 2019, sipas së cilës Shqipëria është përkeqësuar në vlerësimin e shkallës së perceptimit të investitorëve, nga niveli 59.8, në 53.5.
Pa u ndalur sot në shqetësimet që kanë të bëjnë me faktorët ekonomikë dhe financiarë, dua të tërheq vëmendjen ndaj aktorëve politikë, që faktori kryesor i këtij përkeqësimi është kriza e rëndë politike në vend.
Ndaj duhet urgjentisht vendosja e dialogut politik dhe bashkëpunimit për adresimin e menjëhershëm dhe të besueshëm të kushteve të Bundestagut.
Përndryshe, jo vetëm çelja e negociatave me Bashkimin Europian pamundësohet, por vendi ynë do humbasë më shumë besueshmërinë e investitorëve të huaj seriozë./Fjala.al
