Ceremonia e ndarjes së çmimeve Oscar edhe këtë vit do të zhvillohet pa prezantues.
Karey Burke, presidente e rrjetit televiziv ABC, që transmeton Oscars, u shpreh se vendimi ishte marrë për shkak se shfaqja e vjetshme kishte funksionuar më së miri në këtë formë.
Kujtojmë se vitin e kaluar, për herë të parë që prej vitit 1989 , spektakli madhështor që nderon më të mirët e kinematografisë u zhvillua pa prezantues.
Çmimet “Oscar” do të prezantoheshin nga Kevin Hart, por ai u dorëhoq pasi iu kërkua që të kërkonte falje publikisht në lidhje me disa deklarata fyese ndaj komunitetit LGBT+, rreth viteve 2009-2010.
Nuk dihet nëse largimi i tij ndikoi apo jo, por vitin e kaluar shifrat e audiencës u përmirësuan pasi ceremonia u ndoq nga 29,6 milionë shikues, 12% më shumë se në vitin 2018, kohë kur u shënua audienca më e ulët në historinë e çmimeve Oscars.
Këtë vit, Oscars do të transmetohen në ABC më 9 shkurt ose më 10 shkurt, ora 12:30 pas mesnatës me orën tonë lokale.
