Ambasada Gjermane në Tiranë ka publikuar në faqen e saj zyrtare njoftimin mbi procedurën që duhet të ndjekin të gjithë qytetarët shqiptarë që janë të interesuar të punojnë në Gjermani. Ambasada u bën apel shtetasve shqiptarë që të mos ndërmarrin udhëtimin jashtë vendit pa aplikuar më parë në zyrat e ambasadës në Tiranë.
Të gjithë të interesuarit për punë jashtë vazhdojnë të kenë nevojë të pajisen me vizë pune, nëse duan të nisin një marrëdhënie punësimi në Gjermani.
“Për këtë vizë duhet të aplikohet pranë Ambasadës Gjermane në Tiranë përpara se të ndërmerret udhëtimi drejt Gjermanisë”, shkruhet në njoftim.
Kujdes
Udhëzime të përgjithshme rreth aplikimit për vizë
Personat, që ju drejtohen jashtë territorit të Ambasadës dhe që ju ofrojnë lehtësira në aplikim përkundrejt parave, NUK janë personel i Ambasadës dhe nuk i lidh asgjë me Ambasadën. Krahas kësaj Ambasada këshillon urgjentisht të mos lini takime përmes agjensive të udhëtimit, të ashtuquajtura „agjensi vizash“. Rezervimi i një takimi bëhet në mënyrë të pavarur dhe pa kosto përmes faqes së internetit të Ambasadës. Përmes një kërkese me email apo përmes kontakteve të tjera me Ambasadën mund të merrni këshillim të kualifikuar dhe pa kosto lidhur me cështjet e vizave.
Për çdo informacion të mëtejshëm Ambasada ka vendosur në dispozicion linkun: https://tirana.diplo.de/al-sq/service/visa-einreise
