Nga /Fjala.al/
Dalin detaje të reja në lidhje me vrasjen makabre të ndodhur mbrëmë në Paskuqan. Policia e Kamzës kishte marrë njoftim dhe madje kishte marrë edhe një denoncim nga viktima Enkeleda Çapoku, gruaja e cila u vra me mjete të forta nga kunati i saj, vëllai i burrit.
Historia e kësaj vrasjeje të paralajmëruar ka nisur në kohën kur bashkëshorti i Enkeledës ka rënë në burg e për pasojë vëllai i tij, pra autori i vrasjes i kërkonte marrëdhënie intime. Ai i bënte presion duke i dërguar video e foto vëllait të tij në burg, bashkëshortit të saj. Detajet i ka bërë publike nëna e viktimës e cila jetonte me të bijën për shkak se i duhej për ta mbrojtur, por nuk ishte e thënë.
Erdeti ka shkuar në banesë mbrëmë duke shqyer derën dhe duke e goditur nënën e Enkeledës dhe duke e lënë pa ndjenja. Më pas ka masakruar të bijën duke i marrë jetën në sy të vajzës. Ai është larguar në drejtim të paditur ndërkohë që policia e gjithë Tiranës prej shumë orësh thuhet se është në kërkim të tij. Në fakt sot rrugët e Tiranës nuk kishin asnjë postbllok për të bërë të mundur kontrollin e mjeteve të transportit urban pasi bëhet me dije se autori i kësaj masakre është larguar me këmbë nga shtëpia e viktimës.
Prokuroria e Tiranës ka nisur hetimet për të zbardhur ngjarjen. Ka kërkuar nga komisariati i Kamzës t`i vihet në dispozicion kallëzimi i bërë nga ana e viktimës, e cila ka më shumë se gjashtë muaj që ka kërkuar urdhër-mbrojtje nga dhuna dhe presioni që ushtronte Erdeti.
Sipas nënës së Enkeledës bëhet me dije se ai ishte pijanec dhe përdorues droge. Ai kishte shumë kohë që e përndiqte nusen e vëllait të tij, ndërkohë që detajet për mënyrën se si i ka marrë jetën 30-vjeçares janë përtej imagjinatës njerëzore. Ajo ka bërë me dije publikisht, në një intervistë në News 24 se ai pasi e ka qëlluar me shkop i ka prerë damarët e krahut dhe të qafës!
