Dalin fotot e Asamblesë Kushtetuese të dalë nga zgjedhjet e dhjetorit 1945, e cila shpalli Shqipërinë “Republikë” dhe vetë u shndërrua në Kuvend Popullor. Foto datojnë në 11 janar të vitit 1946, plot 74 vite më parë. Foto janë publikuar nga Artan Lame, i cili ka shoqëruar edhe me shpjegime.
Në Asamblenë Kushtetuese, e cila u mblodh në janar 1946. janë Tuk Jakova, Gogo Nushi, Zylyftar Veleshnja, Ymer Dishnica, Ramadan Citaku, Bedri Spahiu, Medar Shtylla, Omer Nishani, Myslym Peza, Enver Hoxha, Haxhi Llashi etj.
Asambleja Kushtetuese, janar 1946. Lart: ?, ?, Tuk Jakova, Gogo NUshi, Zylyftar Veleshnja. Poshte, Ymer Dishnica, Ramadan Citaku, Bedri Spahiu, Medar Shtylla, Omer Nishani, Myslym Peza, Enver Hoxha, Manol Konomi, Sejfulla maleshova, Haxhi Llashi, /, Spiro Koleka, Gaqo Tashko.
Më 11 janar 1946, Asambleja Kushtetuese e dalë nga zgjedhjet e dhjetorit 1945, e shpalli Shqipërinë “Republikë” dhe vetë u shndërrua në Kuvend Popullor. Deri në atë moment, duke filluar prej shtatorit 1928, Shqipëria kishte qenë “Monarki”.
Kuvendi i sotëm është vijues juridik i atij Kuvendi të ‘46-ës; Republika e sotme është vijuese e pandërprerë e asaj republike; deri para disa vjetësh edhe ligjet numëroheshin sipas renditjes së atij Kuvendi; e megjithatë sot askush nuk ka kurajën ta kujtojë atë akt.
Republikat mund të jenë të mira apo të këqia, ashtu sikundër mbretërit mund të jenë të mirë apo xhahilë, por sidoqoftë janë fakte historike, që nuk mund të fshihen.
Avazi jonë i vjetër ka qenë dhe vazhdon të jetë që, kur s’na pëlqen fakti, të mos bëjmë një fakt më të mirë, por thjesht të fshijmë a fshehim faktin e vjetër. Le ta shajmë sa të duam atë Republikë, ta dënojmë për krimet që ndodhën dje, apo për paaftësinë tonë për ta ndërtuar siç duhet sot, por datën s’ia fshijmë dot nga kujtesa.
Me ç’pashë (ndjesë nëse gaboj) asnjëri prej institucioneve të larta të Republikës nuk pati mirësinë dinjitoze të kujtonte faktin historik që Republika që ata qeverisnin është shpallur më 11 janar 1946.
Sa për kujtesë. Republika e ‘46-ës është republika e dytë e shqiptarëve, pasi 21 vjet përpara saj, në janar 1925, ata i kishin dhënë për herë të parë shtetit të tyre emërtimin “REPUBLIKA SHQIPTARE”.
