Partia Socialiste ka bërë publik emrat e 711 delegatëve që do të jenë pjesë e kongresit të vet që do të zhvillohet pas më shumë se një muaji. Por në mekanizmin se si është menduar të zhvillohet ky kongres pjesëmarrja mendohet të shkojë diku te 1000 persona.
Ndonëse ende nuk janë zgjedhur krejt kryetarët dhe këshillat nëpër rrethe, PS-ja ka bërë publike edhe të gjitha strukturat që do të përfaqësohen, këtu përfshi edhe emigrantët. Janë vetëm Italia dhe Greqia që do të sjellin përfaqësi, por mësohet se janë edhe dy shoqata që pritet ti bashkohen kongresit socialist.
Delegatët zyrtarë kanë dalë nga votimi i anëtarësisë përmes parimit ‘një anëtar, një votë’, në çdo bashki të vendit, ndërsa risia në këtë kongres është përfaqësimi i grave në masën 50 për qind. Votimi për delegatët e kongresit u zhvillua më 16 nëntor. Por duket se kjo përqindje është tejkaluar, për shkak të procesit të dekriminalizimit.
Pas zgjedhjes së tyre, delegatëve iu dhanë formularët e dekriminalizimit për t’u plotësuar. Disa prej delegatëve kanë pranuar të dorëhiqen, për shkak të pasigurive me të shkuarën e tyre penale. Kjo bëri që përqindja e grave në listën përfundimtare të delegatëve ta kalojë 50 përqindëshin.
Numrin më të madh të delegatëve e ka Bashkia e Tiranës, me 106, duke u pasuar nga Bashkia e Vlorës, me 40 delegatë, e më pas Fieri, me 34 delegatë. Por, numri i delegatëve të kongresit do të rritet, për shkak se në PS nuk kanë përfunduar ende zgjedhjet për kryetarin e degës në nivel bashkie.
Deri më 15 janar, çdo bashki e vendit do të ketë kryetarin e saj socialist, ndërsa deri në fund të janarit, duhet të përfundojë zgjedhja për këshillat socialistë të qarqeve.
Në kongres do të marrin pjesë dhe 30 delegatë, që u përkasin shqiptarëve në emigracion, të cilët janë votuar nga bashkatdhetarët e tyre. Votimi ka ndodhur në çdo degë të ngritur kryesisht në Greqi dhe Itali, aty ku numri i shqiptarëve është edhe më i madh se në vendet e tjera.
Sipas të dhënave bëhet me dije se delegatë të kongresit socialist me të drejtë vote do të ketë edhe nga shoqatat e ‘Dëshmorëve dhe Veteranëve të Atdheut” dhe nga “Konfederatat e Punonjësve”, të cilët shumë herë i janë atashuar PS-së në aktivitet e saj politike.
Pjesë të kongresit në mënyrë automatike janë dhe ish-kryeministrat socialistë, ish-presidentët, ish-kryetarët e Kuvendit, por edhe deputetët e Grupit Parlamentar Socialist dhe kryetarët e bashkive. /Fjala.al/
