Pas një auditimi për performancën e pajisjes me kasa fiskale gjatë dekadës së fundit, Kontrolli i Lartë i Shtetit del në konkluzionin se Drejtoria e Përgjithshme e Tatimeve dhe Ministria e Financave kanë dështuar në mbledhjen e të ardhurave dhe luftën ndaj evazionit fiskal. Kjo sipas KLSH për shkak të mungesës së objektivave dhe një strategjie efektive.
Politikbërja në dekadën e fundit ka rritur vetëm masat ndëshkimore ndaj biznesit dhe asgjë më shumë. Pajisja me kasa fiskale e bizneseve gjatë 10-vjecarit të fundit nga ana e Drejtorisë së Përgjithshme të Tatimeve dhe Ministrisë së Financave nuk ka sjellë përmirësim në mbledhjen e të ardhurave dhe uljen e evazionit fiskal. Është ky përfundimi i një auditimi të kryer nga ana e Kontrollit të Lartë të Shtetit i miratuar nga kreu i këtij institucioni në fund të dhjetorit 2019. Në auditimin e performancës me temë: “Efektiviteti i kasave fiskale në rritjen e të ardhurave tatimore” të ushtruar në Tatime e Financa u shtri edhe në 6 drejtori rajonale Tatimore.
‘Nga auditivi- thotë KLSH-rezulton se shuma prej 46.5 milionë euro të shpenzuara për 27 lloje të kasave fiskale në përdorim, nuk ka sjellë ndonjë përmirësim të dukshëm në të ardhurat tatimore nga TVSH e brendshme apo nga tatimi i fitimit. Nga 155 mijë kasa të instaluara në total 3/4 e tyre janë vendosur tek biznesi i vogël.
Në krahasim me vitin 2009, ka rënë ndjeshëm pesha e të ardhurave nga TVSH, që mblidhet nga tatimet. Kështu raporton KLSH: Në 2009 tatimet mblidhnin 30% të TVSH-së totale, ndërsa për periudhën nga 2010-2018, pesha mesatare e TVSH-së së mbledhur nga tatimet ishte 24%.
Pra pavarësisht rritjes së xhiros së raportuar nga kasat, ajo që konstatohet sipas KLSH-së në periudhën 2017-2018 është ulja e raportimit mesatar për kupon. KLSH vëren përmes auditimit se mungesa e objektivave dhe një strategjie për pajisjet fiskale ka çuar edhe në dështimin e luftës kundër informalitetit dhe evazionit fiskal. Përkundrazi politikbërja në dekadën e fundit ka rritur vetëm masat ndëshkimore ndaj biznesit, e kryesisht atij të vogël.
Kështu për periudhën 2017-2018 janë konstatuar 9 348 raste të shkeljeve për kasat fiskale, për të cilat DPT ka aplikuar gjoba në vlerën prej 536 milion lekësh ose rreth 4.3 milion €, që përbëjnë pothuaj 10 % të shpenzimeve gjithsej të bëra për kasat fiskale që nga fillimi i implementimit në 2010 ën.
Sipas KLSH-së edhe krijimi së fundmi i faturës elektronike, ‘e-invoice’, me qëllim gjurmimin dhe identifikimit në kohë reale të transaksioneve që kryen biznesi bart disa risqe mes të cilave ka veçuar rritjen e kostos për bizneset nga mospërshtatja e sistemit të ri me pajisjet fiskale aktuale.
/Fjala.al/