Çdo ditë e më shumë në vendin tonë po ndodhin aksidente tragjike. Edhe 2020-ta ka pasur shumë aksidente rrugore për dy javët e para.
Për realitetin e hidhur të qarkullimit rrugor ka folur sot edhe ministri i Brendshëm Sandër Lleshaj.
Ministri nënvizon se policia është në krye të detyrës, e madje ka shtuar masat ndaj shkelësve të ligjit.
Në komentin e tij, ai shkruan se papërgjegjshmëria në qarkullimin rrugor po merr përgjigje të fortë nga Policia e Shtetit. Po sipas tij, papërgjegjshmëria e shoferëve, po vret më shumë njerëz sesa vetë krimi.
Ministri Lleshaj njofton se në javët në vijim, do të prezantohet një paketë e plotë masash ligjore, administrative, operacionale dhe teknike, për më shumë siguri në rrugët tona.
Statusi i plotë
“Papërgjegjshmëria në qarkullimin rrugor po merr përgjigje të fortë nga Policia e Shtetit. Kjo qasje do të njohë intensifikim të mëtejshëm çdo ditë që vjen. Papërgjegjshmëria në rrugë vret më shumë njerëz sesa vetë krimi… … ndaj të gjitha forcat duhet të bashkohen për të mbrojtur jetën njerëzore, përballë saj.
Në javët në vijim do të prezantohet një paketë e plotë masash ligjore, administrative, operacionale dhe teknike për më shumë siguri në rrugët tona… ..
Të gjithë janë të ftuar për kontribut me ide, propozime dhe rekomandime në të gjitha këto fusha. Së shpejti do të ofrohen edhe mundësi teknike për qytetarët që duan të angazhohen në këtë proces shumë të rëndësishëm. 2020: Viti i Sigurisë Rrugore”. /Fjala.al
