Shpërndahen paratë për rindërtimin e pasojave që la tërmeti i 26 nëntorit. Qeveria ka miratuar vendimin për caktimin e njësive zbatuese për hartimin e planeve të detyruara vendore dhe financimin e tyre nga fondi për rindërtimin, miratuar në buxhetin e vitit 2020. Vendimi është botuar në Fletoren Zyrtare dhe hyn në fuqi sot. Vendimi parashikon caktimin si njësi zbatuese për hartimin e planeve të detyruara vendore të:
a) Agjencisë Kombëtare të Planifikimit të Territorit (AKPT), për hartimin e planeve të detyruara vendore për 9 bashki: Durrës, Kamzë, Kavajë, Krujë, Kurbin, Lezhë, Mirëditë, Shijak, Vorë;
b) Bashkisë Tiranë për hartimin e planit të detyruar vendor për Bashkinë e Tiranës.2.
Efekti financiar, prej 262 297 000 lekësh, përballohet nga zëri “Fondi për rindërtimin”, i miratuar në buxhetin e vitit 2020 dhe, përkatësisht:
a) Agjencisë Kombëtare të Planifikimit të Territorit, në buxhetin e miratuar për vitin 2020, i shtohet fondi prej 137 420 000 lekësh, për hartimin e planeve të detyruara vendore të bashkive, sipas shkronjës “a”, të pikës 1, të këtij vendimi;
b) Bashkisë Tiranë, në buxhetin e miratuar për vitin 2020, i shtohet fondi prej 124 877 000 lekësh, për hartimin e planit të detyruar vendor të saj.
Fondet e mbetura të papërdorura, pas përfundimit të procedurave, në zbatim të këtij vendimi, kthehen në buxhetin e fondit për rindërtimin. Qeveria ngarkon ministri i Shtetit për Rindërtimin, Ministria e Financave dhe Ekonomisë, Agjencia Kombëtare e Planifikimit të Territorit dhe Bashkia Tiranë për zbatimin e këtij vendimi.
