Kancelarja gjermane Angela Merkel ka deklaruar se tashmë ka ardhur koha që Bashkimi Evropian të hapë negociatat me Shqipërinë.
Sipas saj, Shqipëria i ka plotësuar detyrimet e vendosura nga Brukseli, veçanërisht në sistemin e drejtësisë përmes procesit të Vettingut.
Ajo u shpreh se Bashkimi Evropian duhet ta trajtojë Shqipërinë dhe Maqedoninë në mënyrë të barabartë, edhe pse të dyja vendet do të ndjekin procedura të ndryshme deri në anëtarësimin e tyre në familjen evropiane.
Për këtë arsye, ajo kërkoi që Bashkimi Evropian të hapë negociatat me Shqipërinë.
“Është shumë e rëndësishme që të ketë përparime në çeljen e negociatave me Shqipërinë dhe Maqedoninë e Veriut. Shqipëria ka plotësuar shumë kërkesa që i kishim vendosur. Sidomos procesin e Vettingut dhe tani ka ardhur koha që të çelen negociatat”, tha Merkel gjatë konferencës për shtyp me kryeministrin e Kroacisë, Andrej Plenkoviç.
Duke folur për samitin e Ballkanit Perëndimor në Zagreb, Merkel kujtoi po ashtu edhe se Maqedonia e Veriut e ka plotësuar kushtin që bllokonte deri tani çeljen e negociatave, arritjen e marrëveshjes me Greqinë për çështjen e emrit.
“Nëse duam të jemi të drejtë, atëherë ne duhet t’i trajtojmë të dy vendet së bashku, pavarësisht se ato pastaj do të ndjekin procedura të ndryshme, në bazë të vlerësimeve që do t’u bëhen”, u shpreh Merkel.
Sipas kancelares gjermane, pas mosarritjes së një marrëveshjeje vitin e kaluar, tani BE do ta trajtojë çështjen edhe në samitin e Këshillit të BE-së në Bruksel, qysh në muajin mars.
Sipas ekspertëve politikë në Berlin, me shumë gjasë nuk do të ketë marrëveshje para samitit të Ballkanit Perëndimor në Zagreb, pra, në maj të këtij viti.
Nga ana tjetër, presidenti francez Emmanuel Macron, njeriu që bllokoi hapjen e negociatave midis BE-së dhe Shqipërisë, ka dhënë sinjale për ta ndryshuar qëndrimin e tij, veçanërisht në takimin në Paris me kryeministrin kroat, Andrej Plenkoviç.
