Kryeministri Edi Rama ka përshëndetur sot vendimin e kompanisë Lufthansa për nisjen në një periudhë të afërt të fluturimeve direkte midis Prishtinës dhe Beogradit.
“E përshëndes me kënaqësi marrëveshjen e sotme për fluturimet Prishtinë-Beograd, që siç tha Sekretari i NATO-s është “një hap i rëndësishëm për qarkullimin më të lehtë të njerëzve e mallrave në Ballkanin Perëndimor”. Ka ende shumë hapa për të bërë me vizion e kurajo në atë rrugë”, shkruan Rama.
Por kryeministri nuk e mbyll këtu reagimin e tij, pasi ka lëshuar edhe një “kunjë” për homologun në Kosovë, Ramush Haradinaj, të cilin edhe e paditi për shpifje pak ditë më parë.
“Shumë mirë bëri edhe Ramushi që e përshëndeti këtë hap. Paqja është tejet e vështirë, por në asnjë rast ajo nuk fitohet me mjetet e luftës dhe popullariteti i përkohshëm që sjellin nganjëherë ato mjete, nuk i sjell asnjë hajër popullit e vendit”, shprehet Rama.
Marrëdhëniet midis Ramës dhe Haradinajt u përkeqësuan pasi ky i fundit e akuzoi kryeministrin e Shqipërisë se ka mbështetur përpjekjet për ndarjen e Kosovës.
Në lidhje me linjën ajrore, zyrtarët në Prishtinë dhe Beograd po i japin mbështetje, ndonëse tek serbët nuk mungojnë pretendimet se fluturimet duhet të nisin pas të hiqet taksa 100% e vendosur nga Kosova.
Për më shumë se 20 vite nuk ka fluturime midis këtyre dy kryeqyteteve, ndërkohë që hapësira ajrore e Kosovës vijon të kontrollohet nga KFOR.
