Ukraina planifikon të hapë këtë vit ambasadën e saj në Shqipëri. Lajmi është konfirmuar nga ministri i Jashtëm ukrainas, Vadym Prystaiko, gjatë konferencës së përbashkët për shtyp me Edi Ramën. Rama ndodhej në Kiev në cilësinë e drejtuesit të OSBE-së.
“Këtë vit ne do të hapim ambasadën tonë në Tiranë. Kemi punuar për këtë për një kohë të gjatë dhe shpresojmë se ky hap do t’i ndihmojë vendet tona të afrohen më shumë”, citohet nga mediat vendase ministri Prystaiko.
Prystaiko shtoi gjithashtu se ky vit do të jetë “viti i lulëzimit” në marrëdhëniet Shqipëri-Ukrainë.
Shqipëria ka marrë për një vit drejtimin e Organizatës për Siguri dhe Bashkëpunim në Evropë (OSBE). Kryeministri Edi Rama ndodhej sot në Ukrainë si drejtues i presidencës shqiptare të OSBE, ndërkohë që vizita të ngjashme pritet të zhvillojë edhe në Rusi e SHBA, si dhe shtete të ndryshme të Evropës./Fjala.al
