Tirana është tronditur mbrëmjen e sotme nga vrasja e një 28 vjeçari. Ngjarja ndodhi në rrugën “Teodor Keko” në zonën e Astirit, ku viktima Vilson Tafçiu, ka qenë duke qëndruar në ambientet e lokalit.
Dëshmitarët në vendngjarje tregojnë se Tafçiu ka qenë i ulur në lokal në shoqërinë e një vajze, kur autori e ka thërritur për të dalë jashtë. Pasi ka dalë nga lokali, i riu është qëlluar me armë zjarri, duke mbetur fillimisht i plagosur, por për shkak të plagëve të marra ka ndërruar jetë disa minuta më vonë.
Forcat të shumta policie mbërritën menjëherë në vendin e ngjarjes, duke rrethuar të gjithë zonën, si dhe ngritën pika kontrolli në të gjitha akset rrugurore.
Policia nuk ka dhënë ende informacione për autorin, por ndërkohë që të dhëna të tjera po mësohen mbi viktimën. Mësohet se 28 vjeçari përdorte dy mbiemra, Tafçiu dhe Noka.
Ai u deportua në vitin 2018 nga Franca për trafik droge, çka mund të përbëjë edhe një pistë kryesore për autoritetet në hetimin e ngjarjes.
Vilson Tafçiu jetonte në zonën e Institutit në kryeqytet, por te “Astiri” ndodhej për shkak se aty banonte gjyshja e tij, e cila kishte ndërruar jetë së fundmi.
Mbi 20 persona raportohet se janë shoqëruar nga policia për t’u marrë në pyetje, shumica e tyre klientë në lokalin ku ndodhi ngjarja./Fjala.al
