Policia e Durrësit është mbërthyer në një histori të çuditshme që vjen nga dy të rinj, adoleshentë. Një vajzë, e cila ka denoncuar se është abuzuar seksualisht dhe një djalë që pretendon që jo vetëm që nuk ka abuzuar me të po madje ka refuzuar edhe ta takojë më.
Të rinjtë, që janë njohur nëpërmjet Instagramit kanë ngritur akuza të forta kundër njëri-tjetrit. Vajza ka shkuar në polici bashkë me prindërit dhe ka kryer denoncimin.
Ajo iu ka thënë punonjësve të policisë që e kanë marrë në pyetje se djali i kishte kërkuar marrëdhënie seksuale por ajo nuk kishte pranuar. Atëherë ai e kishte kapur forcërisht!
Referuar të dhënave të dëshmisë së vajzës, mësohet se ajo ka thënë se ngjarja ka ndodhur në një ambient të qetë. Por a mund të kryhet një përdhunim në një lokal? Ekspertët e hetimit presin edhe raportin mjeko-ligjor për të mësuar detajet që iu duhen për vijimin e zbardhjes së ngjarjes.
Nga ana tjetër, djali që është i moshës 18 vjeç, ka bërë me dije se jo vetëm që nuk e ka prekur me dorë po madje ka vendosur të mos e takonte më. Sipas tij ajo ishte tjetër njeri në bisedat që zhvillonin në rrjetet sociale dhe tjetër kur e kishte njohur.
Madje ai i ka thënë policisë së ajo nuk kishte pranuar mostakimin në vijimësi dhe më pas e kishte kërcënuar. I riu i ka thënë policisë se mendonte se ajo një ditë nuk do të vijonte më me historinë e kërcënimit, pa menduar se ajo do të sajonte një histori abuzimi seksual.
Tani dëshmitë dhe çështja është në duart e prokurorisë e cila pritet të hedhë dritë mbi këtë ngjarje! n.k/Fjala.al/
