Fotografitë e Aushvicit janë publikuar në 75 vjetorin e çlirimit të kampit nazist të vdekjes. Pamjet e publikuara nga Memoriali dhe muzeu i “Aushvicit” tregojnë ‘Portën e Vdekjes’ në kampin në Poloni.
Kampi më i madh i vdekjes së nazistëve u çlirua nga Ushtria e Kuqe Sovjetike më 27 janar 1945 dhe dita përkujtohet si Dita Ndërkombëtare e Kujtimit të Holokaustit në të gjithë botën. Gjatë javës tjetër, udhëheqësit botërorë do të mblidhen dy herë për të shënuar përvjetorin.
Kampi i “Aushvicit” ishte një kompleks prej 40 kampesh përqendrimi dhe shfarosjeje në Poloni gjatë Luftës së Dytë Botërore, dhe një sit qendror në Holokaustin e planifikuar të nazistëve.
Vlerësohet se 1.3 milion njerëz janë dërguar në Aushvic, dhe 1.1 milion vdiqën atje, përfshirë 960,000 hebrenj, 74,000 polakë jo-hebrenj, 21,000 romë, 15,000 robër lufte sovjetikë dhe deri në 15,000 evropianë të tjerë.
Të burgosurit të cilët nuk vdiqën në dhomat e gazit vdekjeprurës, vdiqën nga uria, rraskapitja, sëmundjet, ekzekutimet individuale, dhuna ose u vranë gjatë eksperimenteve mjekësore.
Që nga viti 1947, aty ndodhet një muze që ofron turne të drejtuara dhe një qendër arsimore për të thelluar njohuritë e popujve mbi mizoritë masive të kryera në kampet naziste.
Grumbuj të sendeve të lëna pas nga viktimat e kampit ruhen nga fondacioni “Aushvic – Birkenau”. Inventari përfshin 3,800 valixhe, më shumë se 88 paund syze, 379 uniforma me shirita, 246 shalle lutjesh dhe më shumë se 12,000 tenxhere dhe tiganë të sjella në kamp nga viktimat që besuan se ata përfundimisht po zhvendoseshin.
Ky vend vitin e kaluar regjistroi një numër rekord prej 2.3 milionë vizitorësh.
Sot, të mbijetuarit janë kryesisht 80 ose 90 vjeç, disa jetojnë në Gjermani, Poloni, Suedi, Rusi, Shtetet e Bashkuara dhe Izrael. Aushvic ishte kampi më famëkeq në një sistem përqendrimesh dhe kampe shfarosjeje që Gjermania naziste ndërtoi në të gjithë Evropën./Fjala.al/Përshtati: Kamela Liko/ Burimi:DailyMail
