Marrëdhëniet e acaruar midis Serbisë dhe Kosovës ndikojnë edhe te futbolli, ndonëse gjithmonë është parë si sporti që i bashkon njerëzit nga vende të ndryshme të botës.
Dy futbollistë të skuadrës së Jagiellonias, Ognjen Mudrinski dhe Mile Savkovic, kanë refuzuar të marrin pjesë në ndeshjen ndaj Ballkanit në miqësoren e zhvilluar dje në Turqi, shkruan Gazeta Olle.
Vetë Mudrinski e ka konfirmuar këtë lajm dhe ka thënë se vendimin e morën pas bashkëbisedimit edhe me shtabin teknik.
“Së bashku me stafin teknik ne kemi vendosur që të mos e luajmë këtë ndeshje”-u shpreh futbollisti.
Dy futbollistët në fjalë u bashkuan me shumicën e lojtarëve serbë, të cilët pas presionit nga Beogradi, kanë refuzuar të luajnë ndaj Përfaqësueses së Kosovës apo ndaj skuadrave kosovare në Evropë.
Megjithatë ndeshja që u zhvillua ditën e djeshme në Turqi përfundoi me barazimin 3-3, ku për skuadrën e Ballkanit shënuan Arbër Prekazi, Arbër Hoxha dhe Albin Kransiqi./Fjala.al/
