Forcat e Armatosura do të pajisen me rasdarë 3D për zblueshmërinë e objekteve që fluturojnë pa leje në hapësirën shqiptare. Rritja e kapaciteteve operacionale të vëzhgimit ajror do të jetë një nga prioritet e Forcës Ajrore për vitin 2020. Lajmi është bërë i ditur nga zëvendëskomandanti i Forcës Ajrore, kolonel Editson Zarka shpjegon se instalimi dhe vënia në funksion të plotë e radarit 3D është një projekt madhor që ka filluar që në vitin 2017, por që do të kulmojë këtë vit.
“Kjo do të sjellë rritjen e mëtejshme të zbulueshmërisë së objekteve ajrore, mbulimin më të mirë të hapësirës ajrore shqiptare, integrimin me elementet e komandim-kontrollit kombëtar dhe atë të NATO, si dhe rritjen e efiçencës së menaxhimit të trafikut ajror ushtarak e më gjerë.”, – thotë kolonel Zarka.
Baza Ajrore e Kuçovës, e cila do të shndërrohet në një bazë taktike ajrore e NATO si një projekt madhor i vendit, ministrisë së Mbrojtjes dhe Forcave tona të Armatosura është një tjetër prioritet i rëndësishëm në punën e Forcës Ajrore për këtë vit.
“Puna e filluar vitin që shkoi do të finalizohet me jetësimin e disa nën-projekteve, të cilat do të bëhen të mundura në bashkëpunim të ngushtë me NSPA (NATO Support and Procurment Agency)”, thekson zëvendës komandanti i FA.
Rritja e kapaciteteve operacionale të Forcës Ajrore është një tjetër element i rëndësishëm ku në fokus do të jenë Baza Ajrore Farkë dhe Qendra e Kontroll – Raportimit.
Trajnimi dhe stërvitja do të marrin një dimension të ri përse i përket përzgjedhjes dhe trajnimit të pilotëve të rinj, ashtu edhe ruajtjes së aftësisë operacionale të pilotëve në kuadër të NATO. “Fokus i Forcës Ajrore për vitin e sapo nisur do të jetë edhe përmbushja e misionit për të shërbyer sa më mirë, sidomos në situata e emergjencave civile” shkruhet në njoftimin e Ministrisë së Mbrojtjes.
