Prokuroria e Posaçme Kundër Korrupsionit dhe Krimit të Organizuar (SPAK) do të thërrasë gazetarin Artan Hoxha për të dëshmuar në lidhje me videon me kokainë të kryebashkiakut të Bulqizës.
Sipas të dhënave SPAK e ka kërkuar dëshminë e gazetarit investigativ, në cilësinë e dëshmitarit për rastin e kryebashkiaku të Bulqizës Lefter Alla.
Një video e publikuar ditën e djeshme nga gazetari ka sjellë hapjen e një çështje penale për kryebashkiakun Alla, pasi ky i fundit është akuzuar si personi që në pamje duket teksa konsumon kokainë në një lokal privat.
Vetë Artan Hoxha nuk ia ka përmendur fillimisht emrin kryebashkiakut, teksa pas publikimit (fillimisht disa foto) të pamjeve, ka qenë PD ajo që ka shqiptuar emrin e Lefter Allës. Në mbrëmje Hoxha është shprehur se e ka patur videon prej disa muajsh, ndërsa vetë Lefter Alla në disa prej reagimeve të tij nga dje dhe sot, ka deklaruar se video është montazh për të cilin ai ka qenë në dijeni prej thuajse një viti.
Përgjatë gjithë ditës së sotme kryebashkiaku i Bulqizës deklaroi se do të bëjë një kallëzim penal ndaj ish-deputetit të PD-së Ervin Salianji, i cili dje në emër të selisë blu doli për të shqiptuar emrin e tij si personi që shihet në video duke konsumuar kokainë. n.k/Fjala.al/
