Një avion me 83 persona në bord me destinacion Kabulin është rrëzuar në Gazni të Afganistanit. Si pasojë e këtij rrëzimi, deri më tani janë raportuar 43 viktima. Sipas një zyrtari avioni është rrëzuar si pasojë e problemeve teknike.
Zëdhënësi i guvernatorit të Ghazni, Aref Noori është shprehur se nuk dihet nëse bëhet fjalë për një një aeroplan ushtarak apo civil.
“Avioni është në zjarr dhe fshatarët po përpiqen që të shuajnë flakët.”, -u shpreh ai.
Autoriteti Afgan i Aviacionit Civil (ACAA) shkroi në një deklaratë se “nuk ka regjistruar asnjë rrëzim tregtar avioni” .
Disa media afgane kanë thënë se avioni i përkiste kompanisë kombëtare Ariana Afganistan Airlines. Kjo e fundit me anë të një llogarie në Facebook ka deklaruar se të gjitha fluturimet kanë përfunduar normalisht.
Ariana Afganistan Airlines (AAN), është në listën e zezë të kompanive fluturuese në Bashkimin Evropian. Avionët e kësaj kompanie përdoren ndonjëherë nga ushtria afgane, e cila i merr me qira për transportin e trupave brenda vendit. Përveç Ariana Afganistan Airlines, Afganistani ka vetëm një kompani ajrore private private, Kam Air, e cila është gjithashtu në listën e zezë evropiane./Fjala.al
