Ismail Kadare ka qenë disa herë kandidat për çmimin “Nobel” në letërsi. Por kryesia e Akademisë së Shkencave të Shqipërisë ka zgjedhur një ditë simbolike, 84 vjetorin e lindjes së tij për ta ripropozuar para Akademisë Mbretërore të Shkencave të Suedisë si kandidat për çmimin Nobel në letërsi.
Meritat letrare të shkrimtarit më të njohur shqiptar, Ismail Kadaresë, janë të shpallura edhe në kryeqendra të tjera të letërsisë dhe kulturës botërore.
Në vitin 2005 Kadare fitoi çmimin ndërkombëtar “The Man Booker” International Prize (Njeriu ndërkombëtar i vitit), i njohur si çmimi i nobelistëve, për të cilin konkurruan autorë nga të gjitha kontinentet dhe me njohje botërore. Ky është çmimi më i lartë që ka marrë letërsia shqipe qysh prej fillimeve të saj.
Në vitin 1992 ai fitoi çmimin Prix Mondial Cino Del Duca (Mondial Sino Del Duka)(Francë). Në vitin 2009 iu dha çmimi i “Asturias”, që shënjon mirënjohjen më të lartë për gjithë letërsinë hispanike.
Në vitin 2015 shteti i Izraelit i dha çmimin “Jerusalem”, që jepet për personalitete të letërsisë me ndihmesa të jashtëzakonshme në dobi të lirisë së mendimit.
Për kontributet e tij dhënëse e pasuruese në qytetërimin europian, Ismail Kadare është nderuar me urdhrin më të lartë të Francës: Kalorës, Oficer dhe Komandant i Legjionit të Nderit.
Gjatë vitit 2019 Ismail Kadare u shpall fitues i tri prej çmimeve më të rëndësishme letrare dhe intelektuale në shkallë botërore: në Shtetet e Bashkuara të Amerikës ai mori trofeun Neustadt (Njustad), që konsiderohet Nobeli i Amerikës.
Me çmimin Pak Kyongni (Pak Knjonjí), që iu dorëzua në Korenë e Jugut, Kadare mori një prej vlerësimeve më të larta në një anë tjetër të globit, në Azi, duke e shtrirë në mënyrë sovrane përmasën e veprës së vet në shkallë botërore.
