Urdhëruesit dhe njerëzit që kanë organizuar pengmarrjen e dhunshme dhe më pas zhdukjen e trupit të Jan Prengës mësohet se janë tre emrat kryesorë të botës së krimit në Shijak, Vlorë dhe Shkodër.
Jan Prenga, babai i 5 fëmijëve u rrëmbye më 17 janar në Kamëz nga Altin Hajri nga Shijaku, M.Bajri nga Shkodra dhe D. Rexhepi nga Vlora. Të tre këta persona dyshohet se janë kokat e këtij krimi të rëndë.
Emrat e tyre mësohet se kanë dalë në përgjimet e kryera të bisedave mes familjarëve të Jan Prengës, djalit të tyre në Angli, Astrit Prenga dhe disa prej anëtarëve të grupit Hajri në Shijak.
Të tre këto personazhe të sipërcituar, njihen me aktivitet të dendur kriminal, ku njëri prej tyre si D.Rexhepi, spikatet në kartotekat e policisë kriminale dhe si vrasës gjakftohtë dhe i arratisur disa herë nga qelitë e burgut.
D.Rexhepi, monitoron dhe kontrollon linja të trafikut të Kokainës nga Ekuadori në drejtim të disa vendeve të Bashkimit Europian, ku dyshohet se bashkëpunon me M.Bajrin nga Shkodra dhe Altin Hajrin nga Shijaku.
Grupi kriminal që vepron në disa shtete të Europës, qëllimin kryesor ka pasur mbajtjen peng të Jan Prengës, njërin nga 4 vëllezërit Prenga,ku synimi ishte për ti bërë presion Astritit, korrierit të tyre në Angli, për të nxjerë sasinë e drogës prej 283 kg kokainë, që ky i fundit mbante peng dhe nuk e tregonte destinacionin se ku e kishte çuar.
Por me sa duket situata, i ka dalë jashtë kontrollit pasi Jan Prenga në rrëmbim e sipër është qëlluar me sende të forta dhe për pasojë ka gjetur vdekjen e menjëhershme, duke i mbetur trupi i pajetë në dorë të anëtarëve të bandës Hajri në Shijak.
Nga ana tjetër, familjarët e Prengës deri në momentin e ndërhyrjes së policisë në kompleksin “Golden në Shijak”, në asnjë moment nuk kanë bashkëpunuar me policinë. Kjo edhe si pasojë e këshillës që u ka dhënë nga Anglia në telefon Astrit Prenga, duke i këshilluar që të mos bashkëpunonin me policinë, Jan Prenga sipas vëllait të tij në Angli, ndodhej në Shijak.
