Gazetarja Klodiana Lala e ka cilësuar paketën “Anti-KÇK” si një ligj skandaloz, që sipas saj, zbeh në mënyrë drastike rolin e prokurorëve, dhe sidomos atyre të SPAK. Në emisionin “Real Story”, gazetarja Lala debatoi me avokatin e biznesmenit Edmond Bego, teksa u ndal te rasti i Lulzim Berishës.
Për Lalën, Lulzim Berisha është i dënuar me vendim të formës së prerë dhe me të drejtë mund të cilësohet si kreu i një bande kriminale, por për avokatin nuk mund të ndodhë kështu, pasi ai e ka kryer dënimin.
“Ka dalë nga burgu ai tani, nuk është më kryetar bande. Ka mbaruar dënimin”, ndërhyri avokati Leka.
“Unë nuk pashë në asnjë rresht të policisë që Lulzim Berishës t’i jetë bllokuar pasuria. Ku po shkon me këtë? Po intimidon gjyqtarë e prokurorë. Me këtë mekanizëm, qeveria kërkon t’i kontrollojë, t’i vërë nën presion. Ndërkohë që prokurori i SPAK do duhet të hetonte krimin e organizuar, pasuritë e tyre, do duhet të merret me një akt normativ”, tha Lala:
“Ti duhet të na lësh radhë të flasim”, ka ndërhyrë sërish avokati Leka por ka hasur në kundëreplikën e gazetares e cila i tha: “Patjetër, por të ishte prishur mikrofoni”.
