Skuadra e Lacios vazhdon të përparojë me hapa të mëdha si dhe të ngrihet në renditjen e klasifikimit në Serinë A. Kjo gjë mund të thuhet se është bërë e mundur nga puna e drejtorit sportiv të këtij klubi, shqiptarit Igli Tare.
Në një intervistë për emisionin “Tiki Taka”, Tare foli për situatën që po përjeton ekipi i tij, ndryshimet e bëra dhe objektivat e së ardhmes.
“Kemi vendosur si objektiv fiks kualifikimin në Champions League. Nëse dikush ka këtë si objektiv është e qartë se mendon që ka një ekip të fortë. Janë disa komponent, të cilët po ecin në mënyrën e duhur. Puna që ka bërë Inzaghi me stafin e tij është fantastike, klima është shumë e mirë në dhomat e zhveshjes, por duhet të qëndrojmë me këmbë në tokë.
Janë ende 17 ndeshje për t’u luajtur deri në fund të sezonit, gjatë kësaj periudhe mund të ndodh çdo gjë. Të fitosh dhe të bindësh është gjëja më e rëndësishme, por për të folur për gjëra më të mëdha se Champions League është ende herët. Është ende herët të flasësh për titullin në Serie A, pavarësisht se rezultatet e thonë këtë”-tha ndër të tjera drejtori sportiv i Lacios.
Më tej ai tha se nëse do vazhdohet me këto ritme atëherë mund të ëndërrohet edhe për titull.
“Nëse në 5-6 ndeshjet e fundit do të jemi ende në garë, atëherë të gjithë së bashku do të ëndërrojmë. Ky grup e meriton aty ku ndodhet, ka shumë entuziazëm në javët e fundit, e rëndësishme është të mbajmë dhe të shfrytëzojmë këtë energji”,- u shpreh Igli Tare./Fjala.al/
