Sot është emëruar në krye të hipotekës së Vlorës drejtuesi i ri. Ai nuk dihet se sa do qëndrojë në atë detyrë. Në fakt duke iu referuar rasteve të fundit ku brenda pak muajve kanë dhënë dorëheqjen tre drejtues dhe një i komanduar, të cilët nuk kanë pranuar ta mbajnë atë drejtori, duket se edhe Alia s`do ta ketë të gjatë. Duke iu referuar ngërçit që ka pasuar nevojën për të patur një drejtues për kadastrën e vendit bregdetar, i cili prej shumë kohësh zien nga skandali me përvetësimin e pronave, “Fjala.al” u interesua konkretisht për dosjen që mban peng këtë zyrë. Prokuroria e Vlorës ka në duar një dokument që lidhet konkretisht me çështjen e shumëpërfolur të përplasjeve për pronat. Ky dokument është një kallëzim i një qytetari që pretendon se ia kanë rrëmbyer pronën e tij dhe madje ai ka emra konkret për këtë çështje.
Kallëzuesi
Kristo Gjoka, i cili pretendon se është pronar i një hapësire toke në Jalë, ka kallëzuar në prokurori 13 persona. Në objektin e kallëzimit, depozituar në Prokurori në fillimin e tetorit të vitit të kaluar, ai ka emra konkret të personave që duan t`i marrin tokën-pronë në bregdet. Ai ka akuzuar drejtpërdrejtë biznesmenin Alban Xhillari, si personin që kërkon t’ia marrë tokën. E gjitha ka nisur me një kërkesë për ta tjetërsuar këtë pronë, për ta kaluar si një tokë shtetërore, por në fakt familja Gjoka e ka fituar çështjen në gjykatë dhe vendimi është i formës së prerë. Në një dalje publike që ata bënë në momentin që depozituan kallëzimin në Prokurorinë e Vlorës hodhën edhe shashkën që dogji drejtorinë e Kadastrës. Ata akuzuan si të përfshirë në historinë e tjetërsimit të asaj prone 3 drejtorë të Kadastrës në Vlorë, 3 nëndrejtorë dhe 23 juristë. Madje atëherë ata pretenduan se të gjitha lëvizjet që janë bërë në këtë zyrë janë bërë pikërisht për të dhënë një vendim të jashtëligjshëm.
Kallëzimi është edhe në KLP
Sipas të dhënave, ngjarja për të cilën askush nuk guxon të qëndrojë në zyrën e kadastrës së Vlorës është bërë e njohur edhe në Këshillin e Lartë të Prokurorisë. Po ashtu Gjoka e ka nisur çështjen e tij edhe në disa ambasada me qëllim që dikush të reagojë. Por siç mësohet në fakt rreth një vit më parë, Gjykata e Apelit në Vlorë ka vendosur që t’i japë pronën familjes Gjoka, dhe të lejojë regjistrimin e saj. Procesi ka vijuar, dhe pronarët jo vetëm që kanë marrë pronën, po kanë bërë edhe shitje në palë të treta, duke zbatuar vendimin e Apelit. Ndërkohë një vendim i Gjykatës së Lartë, në fillimin e qershorit, bëri që palët të hyjnë në një tjetër konflikt. Gjykata e Lartë ka vendosur anulimin e vendimit të Apelit, por palët tashmë kishin nisur zbatimin e vendimit të Apelit. Po nga të dhënat në atë truall, ose pronë, është bërë ndërtimi i një objekti mjaft të njohur. n.k/Fjala.al/
