Albin Kurti u votëbesua dje nga Kuvendi për të marrë drejtimin e qeverisë së Kosovës. Një nga pikat e programit të qeverisë është edhe çështja e bisedimeve me Serbinë.
“Qeveria e re do të udhëheqë me përkushtimin e mbrojtjes së interesit kombëtar, shtetëror e shoqëror, në mbrojtje të sovranitetit e integritetit të Republikës së Kosovës”, thuhet në programin qeverisës të Albin Kurtit.
Çështja e dialogut me Serbinë, konsiderohet si një nga temat më “pikante” të skenës politike duke qenë së brenda këtij viti parashikohet që të përfundojë procesi i negociatave me Serbinë.
Edhe vetë Lëvizja Demokratike e Kosovës ka dhënë miratimin që procesi i dialogut të udhëhiqet nga kryeministri Albin Kurti.
“Dialogu me Serbinë udhëhiqet nga Kryeministri mbi bazën e mandatit kushtetues. Dialogu zhvillohet për çështjet e raporteve bilaterale dhe të fqinjësisë së mirë, përfshirë këtu çështjen e të pagjeturve, reparacioneve të luftës e okupimit, suksesionit të ish-Federatës Jugosllave, në të cilën Kosova ishte element konstitutiv, si dhe për njohje të ndërsjellë midis dy shteteve”, thuhet në marrëveshjen për bashkëqeverisje të LVV-LDK.
Gjithashtu, në marrëveshje është vendosur që tema e bisedimeve mes Kosovës dhe Serbisë të nuk do të jenë çështjet që lidhen me integritetin territorial dhe sovranitetin e vendit.
“Temë e dialogut nuk mund të jenë çështjet që lidhen me integritetin territorial, sovranitetin e vendit, rregullimin dhe funksionalitetin e brendshëm të vendit, karakterin unitar apo krijimin e pushtetit të tretë për vendbanime me popullsi serbe. Kryeministri raporton në Kuvend në baza të rregullta për procesin e dialogut”, shkruhet në marrëveshjen për programin qeverisës.
Albin Kurti dhe Isa Mustafa janë dakordësuar gjithashtu se koalicioni qeverisës do të rishikojë edhe marrëveshjet e arritura deri më tani, për të parë nivelin e zbatimit të tyre nga ana e Serbisë.
Gjithashtu, në bashkëpunim me Bashkimin Evropian, këto çështje do të shtrohen në tavolinën e bisedimeve me Serbinë./Fjala.al/
