“Paqja” e Edi Ramës me gazetarët dhe analistët ka përfunduar.
Kryeministri “ka shpërthyer” sërish kundër gazetarëve dhe analistëve, duke i akuzuar si “avokatë gjynahqarë të krimit”. Në studiot televizive ka patur ditet e fundit diskutime mbi “Operacionin Forca e Ligjit”, ku shumë gazetarë janë të mendimit se rezultatet nuk do të jenë të prekshme për shkak se aksioni shkel të drejtat e njeriut.
Disa analistë kanë ngritur dyshime se aksionet e OFL-së janë të paracaktuara dhe të njëanshme.
Por në një reagim në ‘Twitter’, Rama thotë se në një kohë kur “qeveria është angazhuar në ofensivën më shembullore kundër krimit në historinë e vendit”, të ftuarit në studiot televizive “po lënë kokrrën e namit me dokrrat e dembelizmit të tyre mendor”.
Reagimi i plotë i Ramës
“A janë njerëz këta a ça janë?”,më shkruan një qytetar i tronditur nga komentet e studiove televizive kundër paketës antiKÇK! Eh, kanë kaq kohë që shajnë, akuzojnë, shpifin për lidhjet e qeverisë me krimin dhe mblidhen në sallonet tv sa herë ndodh një vrasje, duke sulmuar qeverinë.
Sot që qeveria është angazhuar në ofensivën më shembullore kundër krimit në historinë e vendit, mblidhen në sallonet tv për të mbrojtur krimin nga qeveria që po shkel të drejtat e atyre, të cilët deri dje pa pikën e turpit, i lidhnin me mua, me PS e me çdo fitore elektorale të PS.
Njerëz janë njerëz, po janë armiqësuar me të vërtetën, me faktet e me vetë profesionin e tyre për inat të qeverisë! Dhe janë kaq qorrazi kundër qeverisë, sa tani janë kthyer befas në avokatë gjynahqarë të krimit, që po lënë kokrrën e namit me dokrrat e dembelizmit të tyre mendor.
