Disa shkencëtarë nga Universiteti Zhejiang në Kinë pretendojnë se kanë zbuluar dy ilaçe që janë efikase kundër koronavirusit.
Lajmi është publikuar nga televizioni publik kinez, i cili raporton se testet paraprake treguan se barnat e quajtur Abidol dhe Darunavir janë në gjendje të neutralizojnë virusin.
CGTN pohon se zbulimi erdhi si pasojë e disa eksperimenteve të kryera me celula në invitro. Në drejtim të ekipit ishte Li Lanjuan, epidemiologe e njohur kineze. Ajo thekson se medikamenti anti-HIV i përdorur fillimisht për të luftuar koronavirusin, është shumë pak efikas.
Ajo kërkon përfshirjen e Abidolit dhe Darunavirit në programin e Komisionit Kombëtar Shëndetësor për trajtimin e pacientëve të infektuar. /Fjala.al