Edhe pse policia ka ditë që gjendet në rrugë duke propaganduar kujdes ndaj rregullave të qarkullimit rrugor, aksidentet vijojnë të vrasin dhe plagosin shqiptarët. Ngjarja e radhës është shënuar në Maliq orëve të para të ditës së sotme. Një grua është nisur me pak shenja jete në spital, ndërkohë policia njofton se është ndaluar autori i aksidentit, i cili në fakt është kapur në spital pasi ka çuar atje të aksidentuarën. Policia njoftoi pak më parë se një aksident i rëndë ka ndodhur këtë mëngjes në fshatin Zvezdë të Maliqit, me pasojë plagosjen rëndë të një gruaje.
Zyrtarisht Policia raporton se është përplasur nga një mjet tip “Benz” shtetasja R. Xh., rreth 40 vjeçe, këmbësore në rrugë, e cila ndodhet në gjendje të rëndë shëndetësore: Më datë 09.02.2020, ora 08:10, në hyrje të fshatit Zvezdë, Maliq, mjeti tip “Benz”, me drejtues shtetasin I. H., banues në Elbasan, ka përplasur shtetasen R. Xh., rreth 40 vjeçe, banuese në Zvezdë, (këmbësore në rrugë) e cila u dërgua për mjekim në Spitalin e Korçës, ku ndodhet në gjendje të rëndë shëndetësore. Drejtuesi i mjetit shtetasi I. H., u shoqërua në Komisariat për veprime të mëtejshme. Grupi hetimor po punon për zbardhjen dhe përcaktimin e shkaqeve të aksidentit. n.k/Fjala.al/
