Prokuroria e Tiranës ka vendosur ta kalojë dosjen e bujshme të pengmarrjes dhe vrasjes makabre të Dodë (Jan) Prengës në duart e Prokurorisë së Posaçme (SPAK). Në kohën kur janë arrestuar 6 persona, janë në kërkim edhe 7 të tjerë, prokuroria dhe policia nuk kanë asnjë gjurmë të trupit të pengut. Ndërkohë mësohet se prokuroria e Tiranës po punon për dosjen që të plotësojë aktet dhe ta nisë drejt strukturës së posaçme hetimore, janë të dhënat që vijnë nga Anglia të cilat kanë hedhur dritë mbi një mori personash që janë të përfshirë në këtë ngjarje.
Ndonëse në Gjykatë është pretenduar se ekzistojnë pamje filmike të momentit kur është nxjerrë trupi i pajetë nga kompleksi ‘Golden’, policia nuk ka mundur t`i gjejë trupin, edhe pse njëri nga të arrestuarit, pretendon prokuroria, se ka treguar detaje tronditëse në lidhje me ngjarjen. Ka qenë dëshmia e Festim Bexhdilit që ka saktësuar faktin se trupin e pajetë të Prengës ia ka dorëzuar Altin Hajrit dhe një personi tjetër të cilin nuk e njihte. Madje nga pretendimet e prokurorisë dhe bazuar edhe në një vendim të zbardhur gjykate, bëhet me dije se punëtori i kompleksit të ketë treguar edhe vendin ku ka bërë dorëzimin.
Tashmë pritet që SPAK, me ndihmën e britanikëve të hetimit të sqarojnë edhe më tej ngjarjen e rëndë, ndoshta ndër më të rëndat e dekadës së fundit, kur një person rrëmbehet në mes të ditës dhe policia reagon pas plot 10 ditëve, kohë kur dyshohet se personi është vrarë ditën e marrjes peng. n.k/Fjala.al/
