Operacioni Forca e Ligjit i dërgoi kërkesë me shkrim dy personave të akuzuar për trafik droge dhe trafik të qenieve njerëzore.
Njëri prej tyre është edhe shtetasi Bardhok Pllanaj, banues në Koplik të Shkodrës dhe i dënuar në Belgjikë për trafik të qenieve njerëzore.
Ai njihet si ‘Sheiku’ i Shkodrës, që pas vitit 2018, kur u arrestua për shkak të një pallati 10- katësh me vlerë 2 milion euro pasi u konstatua se po e ndërtonte pa leje.
Gjatë hetimit rezultoi se pallati po ndërtohej nga para që rridhnin nga aktiviteti i tij kriminal. Sipas policisë ‘Sheiku’ ishte dënuar më parë në Gjermani për trafik të qenieve njerëzore. Një vit më pas në vitin 2019, Pllanajt iu sekuestruan edhe 20 pasuri në prona, si apartamente, biznese, troje, makina etj., kryesisht në Dobraç të Shkodrës.
Për herë të parë emri i Bardhok Pllanajt do të bëhej publik në vitin 2014, gjatë operacionit policor “Laguna e Vilunit”, ku u sekuestruan gati një ton hashash, ku arrestuan shtatë persona ndërsa Pllanaj arriti të shpëtonte.
Por, në tetorin e vitit të kaluar, Pllanaj theu masën e sigurisë arrest shtëpie, ndërsa më pas arrestua në Lushnjë nga policia.
