Historia e shkodranit që ka humbur jetën në një burg në Francë përveç se ka indinjuar mbarë opinioni publik shqiptarë në të gjithë botën, ka bërë të mundur që njerëz të ndryshëm të ofrohen tek familja e tij për të dhënë ndihmën për sjelljen e trupit. Në kohën kur shteti shqiptar dorëzohet, asnjë mekanizëm i Ministrisë së Jashtme nuk i vjen në ndihmë familjes shkodrane, është një i burgosur shqiptar në Greqi që nis në drejtim të familjes human prej 200 eurosh. Ai e ka bërë live dërgesën e tij për familjen duke bërë të ditur edhe faktin se familjet shqiptare që përballen me një hall të tillë janë të shumta dhe se bëhet fjalë për një shtet që kurrë nuk është gjendur pranë familjeve.
Ai quhet Fisnik hasi dhe mësohet se gjendet në burg prej shumë vitesh. Në një intervistë të dhënë në emisionin ‘Shqipëria Live’ ai ka treguar se në burgjet greke ka dhunë e racizëm sidomos ndaj shqiptarëve. I burgosuri është nga Dibra dhe nënvizoi faktin se është i bindur nga rastet që ka parë me sytë e tij në burgun grek, se edhe rasti i të riut nga Shkodra në burgun francez, Mentor Rexha, është vrasje dhe jo vetëvrasje. I prekur nga kronikat televizive që ai ka parë për familjen e shkodranit, i dënuari në Greqi ka kontribuar me një shumë simbolike për kthimin e trupit të tij në atdhe.
Por dibrani i dënuar për grabitje dhe që sipas tij gjendet në burg prej 12 vitesh ka treguar se dhuna e policisë së burgjeve në Greqi është e tmerrshme dhe barbare. Sipas tij ata hyjnë në ambientet e brendshme dhe ushtrojnë dhunë të maskuar duke përdorur elektroshok. Sipas tij edhe në një rast të kohëve të fundit në burgun e sigurisë së lartë, ndodhi diçka për të cilën kanë paguar të gjithë. “Erdhën e na vunë armën në kokë brenda në qeli, që nuk lejohet që jemi në burg e të vijë të na vejë armën në kokë e të na vënë shkelmin në stomak.
Edhe Mentor Rexhën e kanë vrarë jam i bindur se i bëjnë këto gjëra. Pashë nënën e atij të shkretit dhe më erdhi keq se edhe unë njeri me ndjenja jam”. Në fakt në Greqi është mundësuar realizimi i një prej grevave më të mëdha në historinë e burgjeve në Europë disa vite më parë, por autoritete shqiptare asnjëherë nuk u kujtuan të marrin në mbrojtje shtetasit e tyre kur ata dhunohen me pa të drejtë. Rasti i shqiptarëve në burgjet e Europës, kryesisht në Greqi është një nga rastet tipike kur shteti nuk i njeh dhe i braktis shtetasit e vet! n.k/Fjala.al/
