Kryeministri Edi Rama u ka dalë sot në mbrojtje Elvis Naçit dhe Arbër Hajdarit, në lidhje me disa kritika që u janë drejtuar atyre për fondet e mbledhura për tërmetin e 26 nëntorit.
Në mbledhjen e katërt të Komitetit Kombëtar të Rindërtimit, Rama i konsideroi skandaloze goditjet ndaj dy aktivistëve, duke sqaruar se fondet e mbledhura prej tyre nuk janë vendosur ende në funksion për shkak se po pritet realizimi i projekteve të rindërtimit.
“Dua të shpreh solidaritetin tim edhe me dy personat që kam në krah për këto goditje skandaloze që nuk kanë asnjë lidhje me angazhimin dhe solidaritetin e tyre se nuk po bëjnë asgjë dhe donacionet nuk dihen ku kanë shkuar. Dua të bëj me dije se çdo qindarkë është në pritje të ekzekutimit të projekteve. Ekzekutimi i projekteve kërkon edhe pak kohë”, u shpreh Rama.
Naçi dhe Hajdari janë kritikuar për shkak se ende nuk ka nisur rindërtimi i banesave për banorët e prekur nga tërmeti shkatërrimtar. Por, sipas asaj që deklaron kryeministri Rama, fondet e mbledhura prej tyre nuk janë vënë në funksion për shkak se projektet e rindërtimit nuk janë ende gati.
