Kreu i partisë Demokratike, Lulzim Basha ka kërkuar nga të rinjtë e Kukësit që të mos largohen nga qyteti pasi ai do ta ‘qërojë’ kryeministrin Rama nga pushteti.
Gjatë një vizite që zhvilloi në këtë qytet Basha iu drejtua të rinjve se ai nuk do ta lejojë Ramën që të zbrazë Shqipërinë.
Ndaj ka kërkuar prej tyre që të mos e braktisin Kukësin për Anglinë.
“Mos u largoni drejt Anglisë, atë që do të zbrazë Shqipërisë do ta qërojmë. Nuk do ta lejojmë Shqipërinë që të zbraset nga ky brez i mrekullueshëm. Edhe çështjen e universitetit do ta kemi në plan, ashtu si dhe në zonat e tjera ku janë mbyllur universitetet”, u shpreh Basha.
Ai premtoi gjithashtu se kur demokratët të vijnë në pushtet do të heqin taksën e kombit, teksa ripërsëriti kërkesën për zgjedhje të parakohshme.
Kryedemokrati është ndalur në një bashkëbisedim me qytetarët, ku ka premtuar se do të përmirësojë vendin në mënyrë që të rinjtë të mos largohen.
“Rama të çojë vendin në zgjedhje të parakohshme dhe t’i lërë të lirë qytetarët që të zgjedhin. Jo vetëm PD-ja, por e gjithë Shqipëria i ka borxh Kukësit. Është qyteti më i diskriminuar, por është vendi që i jep dritën jeshile, prodhon të gjithë energjinë e Shqipërisë. Asnjë tra, asnjë pengesë nuk do të ketë. Do të keni vetëm lehtësira dhe mundësi, por në fillim duhet të fitojmë betejën që sapo ka nisur”, tha Basha.
