Stuhia që goditi qytetin e Istogut në Kosovë, javën e kaluar, ka shkaktuar një dëm prej afro 1.5 milion euro. Komisionet komunale janë përqëndruar te dëmet e shkaktuara në banesa dhe godinat publike, ndërkohë që dëmet në biznese nuk janë llogaritur ende.
Drejtori për Shërbimeve Publike, Mbrojtje dhe Shpëtim, Enver Rugova, ka treguar për “Kohën Ditore” se dëmet më të mëdha janë shkaktuar në sektorin e bujqësisë, ku, sipas vlerësimeve, dëmi është rreth 623 mijë euro. Shuma e madhe e dëmeve, sipas tij, është edhe në objektet e banimit.
Listën e këtyre dëmeve Komuna e ka në plan t’ia dërgojë Qeverisë së Kosovës. Kurse për rastet emergjente, siç tha Rugova, drejtoria e tij në rastet më të rënda veç ka ndërhyrë me fondet e veta.
