Tragjedia në familjen Tolaj në Ostren të Bulqizës ka ndodhur gjatë natës, ndërsa është zbuluar mëngjesin e sotëm nga kunata. Rreth orës 11:30, kunata kishte shkuar pranë banesës për të ushqyer bagëtitë dhe pasi trokiti në derën e familjes askush nuk është përgjigjur.
Bashkë me ndihmën e fqinjve, kunata arriti të hynte me forcë në banesë dhe aty u përball me tragjedinë.
Nëna, Rajmonda, bashkë me dy fëmijët, Rudinën, 18 vjeçe dhe Fajtonin, 14 vjeç, kishin humbur jetën si pasojë e rrjedhjes së gazit, ndërsa Merita, 8 vjeçe, kishte ende shenja jete. Vajza e vogël u transportua me urgjencë drejt spitalit. Ajo ndodhet për trajtim në Maqedoninë e Veriut, ku është dërguar me helikopter, por deri më tani nuk ka informacione mbi gjendjen e saj shëndetësore.
Nëna dhe tre fëmijët jetonin në banesën ku pati rrjedhje gazi, ndërsa burri i familjes ndodhet emigrant në Greqi.
