Në kuadër të kryesimit të Presidencës së OSBE-së, kryeministri Edi Rama do të zhvillojë një vizitë zyrtare në Rusi, më 26 shkurt. Lajmi është bërë publik disa ditë më parë në Tiranë, ndërkohë që Ambasada e Shqipërisë në Moskë ka njoftuar së fundmi edhe mediat ruse.
“Agjenda është aprovuar tashmë”, konfirmon ambasada shqiptare.
Por edhe pse takimet e kryeministrit Rama nuk janë bërë publike ende, mediat ruse kanë zbardhur disa detaje. Duke citur burime diplomatike, mediat ruse bëjnë me dije se Rama do të takohet vetem Sergey Lavrov, ministër i Jashtëm i Rusisë, raporton Fjala.al
Mediat nuk raportojnë për takime të kryeministrit shqiptar me homologun rus, Mikhail Mishustin, apo me presidentin Vladimir Putin.
Sa i përket takimit Rama-Lavrov, nuk konfirmohet deri më tani për një konferencë të përbashkët për shtyp, megjithatë, agjenda nuk është bërë publike.
Në fund të muajit janar, kryeministri Rama ishte në një vizitë zyrtare në Ukrainë ku u takua me drejtuesit më të lartë, përfshirë kryeministrin dhe presidentin. Ai zhvilloi edhe një konferencë të përbashkët për shtyp me ministrin e Jashtëm ukrainas, Vadym Prystaiko.
Konflikti në lindjen e Ukrainës, e banuar nga rusët, është në krye të agjendës së Presidencës shqiptare të OSBE-së./Fjala.al
