“SHBA-të presin normalizim të marrëdhënieve me Kosovën”. Kështu i bën të ditur Sekretari amerikan i Shtetit, Mike Pompeo, Presidentit serb Vuçiç, përmes një letre.
“Shtetet e Bashkuara vlerësojnë shumë marrëdhëniet me Serbinë dhe kanë në vizion një Serbi demokratike, të zhvilluar ekonomikisht që është në paqe me fqinjët e saj dhe plotësisht të integruar në Europë”, thuhet në letrën e Pompeos për Vuçiç, ndër të tjera.
Më tej, Pompeo vë në dukje bashkëpunimin e gjatë mes SHBA-ve dhe Serbisë, dhe shpreh optimizmin për normalizimin e mëtejshëm të marrëdhënieve me Kosovën.
“Ne jemi të inkurajuar nga ngjarjet e fundit që janë tregues i hapave drejt lehtësimit të investimeve, turizmit dhe lidhjeve tregtare me Kosovën. Ne jemi optimistë që Serbia dhe Kosova do të bëjnë përparime të mëtejshme në normalizimin e marrëdhënieve në të ardhmen e afërt.
Shtetet e Bashkuara dhe Serbia kanë një histori të gjatë bashkëpunimi dhe angazhimi të ndërsjellë. Vendet tona kanë qëndruar krah për krah në të dy luftërat botërore dhe Shtetet e Bashkuara kanë mbështetur për një kohë të gjatë integrimin europian të Serbisë”, shkruhet për Vuçiç, në letrën e Sekretarit Amerikan të Shtetit.
