Si komandant suprem i Forcave të Sigurisë së Kosovës, Presidenti Hashim Thaçi ka parakaluar par atyre sot në 12 vjetorin e Pavarësisë. Ai më pas ka mbajtur fjalim para ushtarëve. Thaçi u shpreh se tani FSK-ja është në etapën e rritjes e konsolidimit dhe se do të pajiset me armatim modern.
“Për të ardhur deri në këtë ditë, që Kosova të ketë ushtrinë e vet, është dashur shumë mund, vullnet, unitet i brendshëm dhe partneritet me ndërkombëtarët, para së gjithash dhe mbi të gjitha me SHBA-në”, u shpreh Thaçi.
Presidenti tha se ushtria e Kosovës ka përbërje etnike e gjinore, ashtu siç e kërkon Kushtetuta.
“Përbërja e saj etnike dhe gjinore tregon zbatimin e standardeve kushtetuese dhe ligjore”.
Thaçi tha gjithashtu se pas nisjes së transformimit të FSK-së përmes ndryshimeve ligjore një vit më parë, ushtria tash do të forcohet.
“Tashmë në etapën e dytë, ushtria e Kosovës synon objektiva të reja drejt konsolidimit dhe forcimit të mëtutjeshme. Kuadro drejtuese, rritjen e Rekrutëve të rinj, trajnimi dhe forcimi logjistik pajisje më moderne të mundshme”, është u shpreh Presidenti.
Ai tej ka thënë se Kosova do të kujdeset për stabilitetin rajonal, e se në të ardhmen e afërt do të jetë pjesë e Aleancës Veriatlantike.
“Kosova do të jetë prodhues i paqes, faktor i stabilitetit të rajon, bashkëpunëtor i NATO-s dhe në të ardhmen e afërt do të bëhemi pjesë e NATO-s”, ka thënë ai.
Thaçi thotë se bartja e uniformës është privilegj, e ushtarëve u ka treguar edhe njëherë se çfarë ndjesie ka pasur nën uniformën e UÇK-së.
“Më shumë se 20-vjet më parë edhe unë isha në uniformë. Bartja e saj ka qenë nderi im më i madh në jetën time. Unë çdo ditë jam krenar me ju, ndonëse misioni juaj është tjetër, por kurrë mos harroni se ju jeni pasardhësit e Hasan Prishtinës, Isa Boletinit, Adem Jasharit, Zahir Pajazitit, Luan Haradinajt. Ju jeni nderi dhe krenaria jonë e përbashkët”, ka thënë Thaçi.
