Rreth 50 shtëpi pritet të ndërtohen nga fondacioni “Gjurmë shqiptare” në Ishëm të Durrësit, një prej zonave më të prekura nga tërmeti i 26 nëntorit. Gazetari Marin Mema deklaroi në emisionin “Shqipëria Live” në Top Channel se, kjo është pjesë e një projekti të madh së bashku me fondacionin “Gjurmë Shqiptare” me president Marko Kepin. Më tej ai tha se për këtë gjë nevojitet kohë, por ata do të bëjnë të pamundurën për të mos hequr dorë nga rruga e tyre, edhe nëse i duhet të ndeshen me pengesa të mëdha.
“Ne bashkë me djemtë këtë mesjavë do të shohim dhe disa raste të tjera dhe më pas do të vendosim në bazë projektin e madh. Kemi vendosur për Ishmin, që ka rezultuar me 250 shtëpi të shkatërruara. Ne nuk po themi që do të krijojmë geto por do të përpiqemi që të ndërtojmë strehëza moderne dhe të sigurta”, u shpreh Mema.
Sa i përket fondeve të mbledhura për Shqipërinë në Konferencën e Donatorëve, Marin Mema theksoi se është me rëndësi që i gjithë procesi të monitorohet nga ndërkombëtarët.
