Socialistët e Shkodrës nuk pranojnë më situatën e krijuar prej muajsh brenda radhëve të selisë rozë, ku që prej shtatorit nuk ka një kryetar të kësaj force politike. Nisur nga kjo situatë, Asambleja e Partisë Socialiste të rrethit, në një shkresë zyrtare i është drejtuar Kryesisë së PS, kreut të saj, Edi Rama dhe Sekretarit të Përgjithshëm, Taulant Balla, ku mësohet se kërkojnë caktimin e deputetit Luan Harusha, si Kryetar të PS-së deri në zgjedhjet e ardhshme.
Propozimi për një emër të tillë në krye të PS-së së Shkodrës është firmosur nga 27 anëtarë të këshillit bashkiak të grupit të PS-së dhe 120 anëtarë te Asamblesë të Partisë Socialistë në Bashkinë Shkodër. Ato e kanë bazuar këtë emër, në angazhimin e tij në fushatat zgjedhore të PS dhe rezultat pozitive në Bashkinë Shkodër.
Ka qenë një shkresë që është vënë në dispozicion të medieve orëve të vona të mbrëmjes së djeshme në të cilën përcaktohet edhe neni në të cilin janë mbështetur për të bërë kërkesën. PS e Shkodrës është pa një kryetar, ndërkohe që tashmë kërkesa e socialistëve të Shkodrës pret një përgjigje konkrete nga lidershipi i PS-së për propozimin e ardhur nga baza të cilët kërkojnë Luan Harushën si drejtues të PS-së, Shkodër. n.k/Fjala.al/
