Policia ka bërë me dije se ka goditur një rast të armëmbajtjes pa leje nga sinjalizimi i qytetarëve. Pas telefonatës së marrë në sallën operative të Drejtorisë së Policisë së Durrësit se në ambientet e një lokali ndodhej një person i armatosur, policia ndërhyri duke arrestuar A. S. 38 vjeç, pasi i gjeti dhe sekuestroi në cilësinë e provës materiale një armë zjarri pistoletë “Ekol”, të cilën e mbante pa leje.
Materialet i kaluan Prokurorisë së Rrethit Gjyqësor Durrës për veprën penale “Armëmbajtja pa leje”, për të cilën parashikohet dënimi deri në 7 vite burg. Personi që e mbante armën është justifikuar se ka probleme me persona të tjerë dhe është i detyruar të mbajë armë për vetëmbrojtje por policia nuk i ka lënë hapësirë të justifikohet. Madje e kanë dërguar menjëherë si rast edhe në zyrën e shtypit për ta shpërndarë për medien për shkak të bashkëpunimit mes popullit dhe policisë.
